महागाईने त्रस्त झालेल्या एका व्यक्तिची व्यथा मांडणारी ही सुंदर कविता
'महागाई'
लेखिका: डॉ. ज्युबेदा तांबोळी
महागाई। महागाई। महागाई
किती मिळविले पुरत न्हाई ।
दिवसभराची आमची कमाई
खाऊन बसते ही महागाई ।
दोघं राबतो ढोरावाणी
मुलांना देण्या अन्नपाणी ।
पोटापुरती मिळता भाकरी
भाजीसाठी होते उधारी ।
उधारीचा भाव वेगळा
महागाईचा न्याय निराळा ।
खिसा राही सदा मोकळा
जीव आमचा होई गोळा ।
गरजा अन्न ,वस्त्र, निवारा
आम्हा केवळ अन्नाचा सहारा ।
चाले आम्हा पडका निवारा
हौसेला ना कधीच थारा ।
मजुरी वाढते पैशापैशाने
महागाई वाढते रूपयारूपयाने ।
महागाई तू का असशी
का ठेवशी आम्हा उपाशी ।
कोणत्याही टिप्पण्या नाहीत:
टिप्पणी पोस्ट करा