नारी तुला मुक्त व्हायचे असेल तर।
लेखिका: डॉ. ज्युबेदा तांबोळी
हुंड्यासाठी सुनेला
गाडीसाठी वहिनीला
हौसेसाठी पोरीला
जाळणे आता बंद कर
नारी तुला मुक्त व्हायचे असेल तर ।।१।।
निराश होते कुणी
मुलगी झाली म्हणुनी
चाचणी तिची पाहुनी
हत्या करणे बंद कर
नारी तुला मुक्त व्हायचे असेल तर ।।२।।
थापा ऐकुनी पुरूषी
सवत नको बनूस
पोटासाठी स्वतः ची
अब्रू विकणे बंद कर
नारी तुला मुक्त व्हायचे असेल तर ।।३।।
सासूला मान आई
वेगळ्याची नको घाई
सुखाची तव भलाई
आश्रमी धाडणे बंद कर
नारी तुला मुक्त व्हायचे असेल तर ।।४।।
पुढे गेली भगिनी
उच्च ठेव विचारसरणी
मुलीला विनाकारणी
बंधन घालणे बंद कर
नारी तुला मुक्त व्हायचे असेल तर ।।५।।
रस्ता,गटार गल्लीबोळ
मुक्तीचाच नको घोळ
सर्व स्वच्छ करण्याआधी
मनातील जळमटे दूर कर
नारी तुला मुक्त व्हायचे असेल तर ।।६।।
कोणत्याही टिप्पण्या नाहीत:
टिप्पणी पोस्ट करा