नाते भावाभावाचे - मराठी कविता

 

" नाते भावाभावाचे "

लेखिका: डॉ. ज्युबेदा तांबोळी

फोटो साभार: गुगल

पूर्वी होता भाऊच भावाचा पाठीराखा

बंधू-प्रेम करणारा लक्ष्मणा सारखा । 

सुख दुःखात प्रेमाची साथ देणारा 

राजमहाल सोडून वनवासी जाणारा ।

आहेत आत्ताही भावाला भाऊ 

म्हणतात इंचासाठी कोर्टात जाऊ । 

संपत्तीपायी सांडतात एकमेकांचे रक्त 

तरी म्हणतात मीच खरा बंधूभक्त ।

 

मला दोन मुलेच, मिरवतात बाबा-आई 

धन खिळवून ठेवण्याची करतात घाई ।

 त्यातील एक म्हणे, तोच तुझा लाडका 

त्यालाच देता जास्त पैसा आडका ।

दोघे करता आई-वडिलांची वाटणी 

पंधरा-पंधरा दिवस होते विभागणी । 

३१ तारखेला थांबावे लागते बागेत

भासवावे लागते, मुलं माझ्या आज्ञेत ।

त्यापेक्षा दोन मुलीच बऱ्या

आधार जीवनी होतात खऱ्या ।