खलिफा हजरत उमर यांचा योग्य न्याय
फोटो साभार: गूगल
आदर्श खलिफा हजरत उमरच्या शासनकाळात एका व्यक्तीने आपली जमीन दुसऱ्याला घर बांधण्याकरीता विकली. पाया खणत असताना जमीन विकत घेणाऱ्याला तेथे सोन्याच्या नाण्याने भरलेले एक भांडे सापडले. तो जमीन मालकाकडे आला आणि म्हणाला, "ही तुमची संपत्ती आहे, याचा स्विकार करा. जमीन मालक म्हणाला, "मी जमीन तुम्हाला विकली आहे. त्याच्या पाताळापासून आकाशापर्यंत जे कांही आहे आता तुमचे". ग्राहक गृहस्थ त्यांना म्हणाले, "मी तुमच्याकडून फक्त जमीन खरेदी केली, त्यातील सोनं नाही". दोघांमधील वाद वाढला आणि निवाड्याकरीता दोघेही खलिफाकडे गेले. त्या दोघांची बाजू ऐकून खलिफा म्हणाले, "तुम्ही दोघेही बरोबर आहात... मला एक सांगा, तुम्हाला मुलंबाळ वगैरे आहेत कां ?" एक म्हणाला, "मला एक कन्या आहे" दुसरा म्हणाला, "मला एक पुत्र आहे". खलीफानी आदेश दिला की, दोघांचे एकमेकांशी लग्न करून टाका आणि सापडलेली संपत्ती दोघांत वाटून टाका.
धन्य तो जमीनदार आणि त्याची जमीन घेणारा तो गृहस्थ. आज जिथे-तिथे लुबाडणूक सुरू आहे. माझे ते माझेच, दुसऱ्याचेही माझेच असे सर्वसाधारण चित्र दिसत आहे. या पार्श्वभूमीवर मला संपत्ती नको म्हणणारे ते महनीय गृहस्थ निःस्वार्थी होते. त्यांच्यातील थोडीतरी निस्पृहता आपल्यात आणण्याचा प्रयत्न करू या.
कोणत्याही टिप्पण्‍या नाहीत:
टिप्पणी पोस्ट करा