इच्छापूर्ती करणारी रात्र: शबे कद्र
फोटो साभार: गूगल
अल्लाह आपल्या भक्तांवर अत्यंत दयाळू, कृपाळू आणि मेहेरबान असतो. अल्लाहने मानवी समाजाला रमजानच्या महिन्यात एक पवित्र भेट म्हणून एक रात्र दिली आहे. रमजानमधील २६ व्या रोजाच्या दिवशी ही रात्र असते. या रात्रीला शबे कद्र म्हणतात. या रात्री केलेली प्रार्थना आणि उपासना एक हजार महिन्यांपेक्षा जास्त पुण्य मिळवून देणारी आहे. या पवित्र रात्रीचा उल्लेख पवित्र कुरआनच्या तिसऱ्या खंडात सूरह (अध्याय) अल्कद्रमध्ये आहे. ज्यात म्हटले जात आहे की, तुम्हाला काय माहित की लैलतुल कद्र काय आहे? लैलतुल कद्र हजार महिन्यांपेक्षा बेहतर रात्र आहे.
या रात्री शांतपणे जागरण करून केल्या जाणाऱ्या सर्व प्रार्थना, नमाज, दुआ, जप (जिक्र तसवी) कुरआन पठन आणि याच प्रकारच्या सर्व उपासनांचा मोबदला हजार पटीने देण्यात येतो.
या रात्री इशाची (रात्रीची) नमाज व तरावीह (रमजान महिन्यातील विशेष प्रार्थना) झाल्यानंतर सर्व मुस्लिम बांधव कुरआन पठण करतात. अल्लाहजवळ दुआ मागतात. या रात्री खास हाफिजींना निमंत्रित करून बयानचे (प्रवचनाचे) आयोजन केले जाते. स्त्रियाही एकत्र येवून नमाजपठण व कुरआन पठन करतात. आपल्या परिवारासाठी अल्लाहकडे दुआ मागतात. शबे कद्र ची रात्र आपणा सर्वांना फलदायी ठरो.
कोणत्याही टिप्पण्‍या नाहीत:
टिप्पणी पोस्ट करा