स्त्री सन्मान आणि इस्लाम
फोटो साभार: गूगल
बरीरह नावाची एक महिला हजरत मुहम्मद (स.) यांच्या धर्मपत्नी हजरत आएशा यांची सेविका होती. तिला हजरत आएशा यांनी मुक्त केले होते. त्या महिलेचा विवाह मुगीस नावाच्या व्यक्तीशी (ज्यांना त्या पसंत करत नव्हत्या) झाला. कांही दिवसांनी त्यांचा हा विवाह संपुष्टात आला. त्यांचे पती त्यांच्याबरोबर पुनर्विवाह करण्याचा आग्रह करत होते. त्यांच्यामागे अक्षरश: रडत फिरायचे. एकदा ते आपली मागणी घेऊन हजरत प्रेषितांजवळ गेले आणि बरीरहने त्यांच्याशी पुनर्विवाह करावा, अशी शिफारस करण्यास भाग पाडले. पैगंबर साहेबांनी बरीरह यांना त्यांच्या पतीची इच्छा सांगितली. बरीरहने विचारले, "या रसूलिल्लाह (स.) हा आपला सल्ला आहे की आदेश?" प्रेषितसाहेब म्हणाले, "हा आदेश नसून केवळ सल्ला आहे". याचा अर्थ असा की, हा जर आदेश असता तर आज्ञापालन करणे भाग पडले असते म्हणून प्रेषित साहेबांनी केवळ सल्ला दिला. बरीरह म्हणाल्या, "मग तर मी त्यांच्याशी विवाह करू इच्छित नाही"..
पैगंबर साहेबांनी त्यांचा आदर राखला. तिला आग्रह केला नाही. एका महिलेच्या इच्छेला प्राधान्य दिले. आजही मुस्लिम समाजात जमाअतीने (समाजाने) मान्यता दिलेल्या रजिस्टरवर महिलेची सही घेतल्याशिवाय तिचा निकाह होत नाही. स्त्री व पुरुष दोघांच्या संमती दर्शक सह्या घेऊनच विवाहविधी पार पडतो.
कोणत्याही टिप्पण्‍या नाहीत:
टिप्पणी पोस्ट करा