श्रावण - मराठी कविता

          आजपासून श्रावण महिना सुरू होत आहे. श्रावण महिना हा सर्व महिन्यांचा राजा आहे कारण निसर्ग हिरवागार झालेला असतो, मने आनंदाने भरलेली असतात. अशा सुंदर श्रावणाचे वर्णन करणारी ही नितांत सुंदर कविता

" श्रावण "

लेखिका: डॉ. ज्युबेदा तांबोळी

आला श्रावण नाचत
सृष्टी डोलाया लागली
हिरव्या स्वप्नांची चाहूल
धरणी मातेला लागली।

होती मृत्तिका आतूर
पानाफुलांची भुकेली
झेप घेऊन बियांनी
पिके डोलाया लागली।

ऋतुराजा हा लहरी
लपंडाव तो दाखवी
इंद्रधनूची मध्यस्थी
रंग मनास मोहवी।

हिरवे होताना शिवार
धनी हरखे मनात 
मालकीण करतीया विचार
बांगड्या करीन हातात।