हे वरदविनायका
हे वरदविनायका
तू सत्वर धावत ये
अंधार फार झालाय
त्यांना प्रकाश देण्या ये।
जनता वाईटाकडून
वाईटाकडे जातेय
विज्ञानाचा या अघोरी
उपयोग करतेय ।
बाँबस्फोट, भ्रष्टाचार
सर्वत्र बोकाळलाय
मारामाऱ्या, खून,चोऱ्या
धुमाकूळ चाललाय ।
मानवालाच तू मन
अन् विवेक दिलास
मानवाच्या मनातील
माया,ममता खलास ।
आईबाप वृद्धाश्रमी
बाळे पाळणाघरात
राहताहेत दुःखाने
अश्रू गिळून मनात ।
विद्यामंदिरातही या
गलिच्छ प्रकार घडे
साऱ्या नात्यांचे आदर्श
बेशुद्ध होऊन पडे ।
मोबाईल विळख्यात
गुरफटलीय जनता
आपुलकी व जिव्हाळा
नाही राहिली ममता ।
म्हणून ....
हे वरदविनायका
तू सत्वर धावत ये।